أغرب قصص الزواج السودانيه

أغرب قصص الزواج السودانيه


يا جماعة بصراحة أنا اشتقت للونسة .. طق الحنك .. عشان كدا البوست دا عايز أخصصو للنضمي ... وياريت لو كل واحد فيكم يتخيل نفسو قاعد قدام التاني ويكتب لينا بنفس طريقة الحكي الاعتيادية ؛ أغرب قصص الزواج التي سمع عنها في بلدنا ..


أنا ببدأ الموضوع بقصة علي قسم اللّه*

علي قسم الله كان خاطب بت عمو .. اتخرج من جامعة النيلين محاسبة واشتغل في الضرائب ، بعد سنتين لقى فرصة اغتراب وجاء السعودية - جدة ..
علي قسم اللّه اشتغل كويس وبعد سنتين جهز كل متعلقات الزواج من شيلة ودهب - نسيت أقول ليكم انو ساكن في قرية قريبة من مدني - عشان كده السكن ما مشكلة أبداً لأنو رسل للوالد المبلغ الكافي لبناء غرفتين ومعاهن صالة رغم انو ما كان ناوي يقعد كتير في السودان.
المهم صاحبنا كان بتصل بصفة مستمرة ببت العم الكانت موجودة في جامعة الجزيرة ولما وصل السودان مشى ليها في الجامعة لانو اجر بوكس من الخرطوم عشان يشيل فيه العفش .. وانتظرها لحدي ما محاضراتها خلصت وبعد داك اتجهوا نحو القرية.
وطبعاً ناس الحلة استقبلوه استقبال جميل وحلو لأنه طيب المعشر ووناس شديد والناس فقدتو .
صاحبنا علي قسم اللّه كان بقضي 29 ساعة من ال 24 ساعة في بيت ناس العروس الجديدة والناس فرحانه ليه شديد والجيب عمران طبعاً ودي كانت أول قصة حب في حياته عشان كده كانت تلك الأيام لا تنسى أبداً بالنسبة ليه.
مع مرور الأيام لاحظ صاحبنا أن بت عمو - ما العروس - أختها معاملتها معاه ما جيدة وبتطلب طلبات كتيرة رغم ان العرس في القرية تكلفتو قليلة لكن الطلبات الكتيرة والمعاملة القاسية من أخت العروس دخلتو في شك ..
والمسألة دي اتواصلت لحدي ما أدّت في النهاية إلى إلغاء الزواج أمام دهشة الجميع.
مافي زول في الحلّة صدّق أن زواج علي قسم اللّه طرشق !!
بعد تلاتة أيام علي قسم اللّه جهز شنطتو وودع ناس الحلّة لأنو ماشي الخرطوم يشوف زملاؤه في الضرائب .. وفعلاً زار المكاتب القديمة وسلم على الكل ولقى كمان ناس جداد اتعرّف عليهم - على قسم اللّه صرح لي بأنو في واحدة من زميلاته من بنات الخرطوم كانت عاجباه شديد وقال يحاول يمكن توافق - وفعلاً حاول أن يقترب منها أكتر لكن للأسف ما لقى تجاوب - باين ربّطت مع واحد من الزملاء - وح يعلنوا الخطوبة قريب .
صاحبنا علي قسم اللّه قعد ليه كم يوم في الخرطوم بعدها رجع القرية .. وهناك كانت أيامه رتيبه.
بعد عشرين يوم قرر العودة للسعودية ، وفعلاً شال الشنطة واتجه نحو موقف البصات .. ووصل مدني ...
في السوق الشعبي بفتش على حافلة أو بص متجه نحو الخرطوم لمح ليه بنت ومعاها امها ... البنت لفتت نظره .. ومشى وراهن.. شافهن دخلن بيت ، مشي لحدي الباب ودق الباب ، فتح ليه الباب ولد صغير .. قال ليه اتفضل ... صاحبنا ما كذب خبر دخل تووش وسأل الولد عن الوالد ... رد عليه الولد : " اتفضل .. أبوي بجي هسه "
وجلس صاحبنا في الصالون وشغلو ليه المروحة - الوقت كان بعد صلاة الضهر - وصاحبنا راح في سابع نومة.
صحا على صوت رب المنزل ، بقول ليه قوم غسّل يدك عشان الغداء جاهز.
بعد الغداء والشاي ،، صاحب المنزل سأل صاحبنا علي : " قالوا سألت عني !! إن شاء اللّه خير ؟!!! "
رد عليه علي : " خير يا عمنا "
- " بصراحة أنا شفت بنت ومعاها مرا دخلوا البيت دا .. والبنت دي عجبتني وأنا عايز أتزوجها !!
سيد البيت استغرب شديد من تصرف علي وقال ليه : " معقولة تدخل بيت من دون ما تعرف أهله ، احتمال تكون البنت دي مخطوبة أو متزوجة !! لكن طالما انت صريح معاي أنا بساعدك ، بس خليني أعرف البنت دي منو . عن اذنك دقائق يا ولدي .. وذهب الرجل للجانب التاني من المنزل عشان يعرف البنت المعنية .
جاء صاحب المنزل وقال ليه : " دا مروة بنت محمد أحمد وأبوها متزوج أخت زوجتي والحمدلله البنت ما مخطوبة .. أنا بشاور أهلها ، بس في الأول عرفنا عن نفسك وساكن انت وين وشغال شنو .

بعد اسبوع من الحادثة دي صاحبنا علي قسم اللّه عقد على مروة والزواج تمّ والحمدللّه. والموضوع دا كان قبل لقائي بعلي قسم الله بعدة سنوات.
وطبعاً علي قسم الله كان زميلي في العمل وبحكم اننا جيران كانت في زيارات متبادلة.
في احد الأيام سألت علي قلت ليه: " ليه مروة وافقت بيك رغم انكم ما عرفتوا بعض وهي كانت مقبولة في احدى الجامعات الولائية لدراسة الطب ؟! "
قال لي : " بصراحة والد مروة كانت ظروفه صعبة وهي لما شافتني ارتاحت لي وقالت تريّح أهلها من التعب ومصاريف الدراسة " .

طبعاً نسيت أقول ليكم اني شفت أولاد علي قسم اللّه ولما كنت بزورهم في البيت كانوا بجوا يقعدوا جنبي ويقولوا لي : " عمو وليد ، عمو وليد ".

دي كانت أغرب قصة زواج أسمع عنها - ولسه عندي قصص - بس ما ح أحكيها إلا بعد ما أسمع بعض القصص منكم.

تقبلوا التحية.

----------------
* تم تعديل الاسماء